OBSCOENUM

OBSCOENUM

inquinatum, impurum est et pollutum seoenô aut coenô, quasi communi protritôque omnium usu inquinatum, κοινὸν enim id notat Graecis, ex phrasi Hebraeorum. Vide inprimis marc. c. 7. v. 2. et Actor. c. 10. v. 14. Cuiusmodi res hominesque non solum a Sacris suis longe arcuit Deus, ut ex Scriptura S. passim liquet: Sed et apud Gentiles pars honoris, qui more Maiorum Diis exhibebatur, erat, ut in eorum conspectu neque diceretur, neque fieret quidquam, in quo obscenitatis aliquid esset, uti disputat Athen. l. 8. Arrian. Dissertat. Epictet. l. 2. c. 8. et Plut. in Quaestion. Rom. Vide quoque supra Festa. Quod postmodum ad honorem hominum translatum. Vide Val. Max. l. 2. c. 1. Principum inprimis, ad quorum etiam statuas vestimenta nudâsse, impietati tributum sub Tiberio, apud Sueton. c. 58. quô nomine crimen Maiestatis illis temporibus appellari consuevisse, notum. Imo et pingi obscena et fingi, lege prohibitum apud Thebanos, ut infra videbimus de Pictura. At, procedente luxu, edisse quoque ac bibisse obscenitates, ex Plinio, Martiali, Aliis, patet. Imo et inter Numina relata. Vide supra Flatus. Vide etiam infra, voce Turpia.